Мамандықтың жаманы жоқ

Мамандықтың жаманы жоқ, бірақ, мұның кез келгеніне икемділік қажет, бұл жай күнелту, тамақ асыраудың ғана жолы емес, үлкен өнерді, зор шеберлікті қажет ететін нәрсе.

Ж. Аймауытов

Мамандық - қарапайым өмір сүру көзі болып табылатын және қандай да бір дайындықты, жауапкершілікті талап ететін қызметтің маңызды бөлігі. Әрине, адам өзінің болашақ кәсібіне әр түрлі жолдармен келеді. Біреулер үшін ойлаған арманның орындалуы, отбасы дәстүрін жалғастырушы, келесі біреулер үшін - жаңалыққа, дербестікке талпыныс, үшінші біреулер үшін - әйтеуір бір мамандық алу керек болған соң және т. б. Мамандықты таңдау үшін, ең алдымен өзін, өз бейімділігін тануы қажет.
Әлемде 40 мыңға жуық әр түрлі мамандық бар. Осы көп салалы мамандықтар арасынан таңдау жасау әрине оңай емес. Ең бастысы - адам еңбекке қабілетті, зейінді болуы қажет және оның мамандығы өскен ортаға маңызды болуы шарт.
Күні ертең мектеп қабырғасынан түлеп ұшып, үлкен өмірге қанат қаққалы отырған түлектер үшін өз таңдауын жасайтын кез келді. Кішкентай кезіңізден  «Өскенде кім болғың келеді?» – дейтін ата-анаңыздың қоятын ең танымал сұрағының астарында үлкен ой жатыр.  Кәсіби болашағыңды дұрыс таңдау қоғамдағы өз орныңды танудың негізі.
Мектеп оқушыларының мамандық таңдауда дұрыс бағыт алу мәселесі мектептің психологиялық қызмет аясында жүргізілетін аса жауапты да маңызды жұмыстарының бірі болып отыр. Бала үшін болашақ мамандықты таңдау өмірлік жолын дұрыс таңдаумен бірдей. Өкінішке орай, біз қазіргі уақытта балалардың таңдауының ақылмен емес, біреудің сөзіне еріп  немесе ата - анасының ықпалымен «қай жерге оқуға түсу оңай» деген көзқарастармен болып жатқанын байқаймыз. Бұл жағдайға 1-курс студенттеріне жүргізілген  сауалнама айғақ болып отыр.

Сонымен мамандық таңдау - тағдырыңды таңдау деген сөз. Кейінгі өмірде өкінбейтіндей, өз қабілеті мен бейімділігіне сай кәсіп түрін таңдау. Бұл өте жауапкершілікті және маңызды іс. Мамандық таңдауда әр адам өзінің қызығушылығына, қабілетіне, бейімділігімен қатар өз ақыл – ойымен дұрыс шешім қабылдау үшін психолог маманның да көмегіне сүйену керек. Мамандық таңдауда сіз қаншалықты ізденсеңіз, нәтижесі де соғұрлым жақсы болады. Өз ісіне сенімді дұрыс таңдаған адам ғана жетістікке жетеді. Ал мамандық алып, кәсіпті игеру үшін оқу орнын таңдау керек екені түсінікті. Бұл жерде неге назар аудару керек? Кез келген оқу орнының басты ерекшелігі оның оқытушы-профессорлық құрамы мен материады-техникалық базасы болып табылады. Оқу процесінің техникалық және материалдық жабдықталуына да (кітапхана, компьютерлік сыныптар, арнайы жабдықталған бөлмелер және т.б.) назар аударған жөн. Студенттердің, әсіресе, таңдаған оқу орны түлектерінің пікірін тыңдаған да артық етпейді.
«Өнерден қуат алмаса, тіршіліктің шырағы өшеді» деп М.Әуезов айтқандай, оқу мен тәрбиенің шырағын қатар жағып, «Үлкен болып қалу үшін  ғаламда, Үлкен арман керек екен адамға»-деп Мұхтар Шаханов жырлағандай, мектеп және колледж түлектері өз жүрек қалауымен мамандық таңдап,  асқақ армандары орындалса екен дейміз.

А.Медешова, З.Химеденова

 

Пікір қосу

Пікір қосу ережелері


1. Латын әріптерін қолданбауға тырысыңыз, сөздерді қатесіз жазып, қазақ әріптерін толық жазыңыз.

2. Егер де сізде біздің мамандар мен психологтарға сұрақтарыңыз болса, оларды сұрақ-жауапта қоюыңызға болады.

3. Егер де сізде ұсыныстар мен тілектер пайда болса, оларды қонақ кітабында жазыңыз.


Қорғау коды
Жаңарту

Соңғы пікірлер

Статистика


Бүгін:1275
Кеше:1922
Барлығы:3073073